2019an ospatu ziren, Hernanin, azkenengo aldiz Extremadurako jardunaldiak. Pandemia gainditu eta gero, hiru urte geroago berriz ere antolatuko da Extremadurako 28garren Jardunaldia, Extremadurako kultura herrian zabaltzeko. Donostiako Centro Cultural Extremeñok antolatzen du, Hernaniko Udalaren eta Extremadurako Juntaren laguntzarekin. Aurten gainera, udazkenean ospatuko da. «Pandemia aurretik udaberrian izaten zen, baina orain udazkenera pasa dute ekitaldia», diote.
Gaur emango diote hasiera, 19:30etan Biteri kultur etxean, Extremadurari buruz eskainiko den pelikula batekin. Extremadurako bizitza eta biztanleak izango dira protagonista pelikulan eta ondoren solasaldi txiki bat ere izango da hurbildutakoen artean.
Bihar, produktuak eta 'Virgen de Guadaluperen' emanaldia
Bihar, berriz, Extremadurako zapore eta usainak irisiko zaizkie hernaniarrei. Hiru urte eta gero, Extremadura hurbilduko da Hernanira asteburu batean. 10:00etan hasita Atsegindegin, Extremadurako jaki gastronomikoen festa egongo da; probatu, dastatu eta erosteko aukera izango da.
Postuak jarriko dituzte, bertako gastronomiarekin eta informazio turistikoarekin. Pintxoak eta ardoa ere izango dira aukeran.
Goiz osoan egongo dira bertan, eta ondo girotuta, gainera. Musikak ez du etenik izango, Extremadurako jotekin eta kantu tipikoekin, eta dantza ere ez da faltako. Gainera, 13:00etan, ohiturari jarraituz Virgen de Guadalupe taldeko koru eta dantzariek emanaldia egingo dute.