Mondragon Unibertsitateak Galarretan duen Oronako kanpusak, aurreko astean eman zion hasiera ikasturteari, ingeniaritzako 120 ikasle berrirekin. Oronan kokatuta dagoen unibertsitate honek, 9 urte daramatza abian, eta diote dagoeneko 1.000 gazte baino gehiago igaro direla bertako ikasgeletatik.
Gaur egun, bi ingeniaritza gradu eskaintzen dira Orona Ideoko kanpusean: Energiaren Ingeniaritza Gradua eta Industria Prozesuetako Ekoteknologiako Ingeniaritza Gradua. Horietan, industria arloko jasangarritasunarekin lotutako alderdiak lantzen dituzte. Bi gradu horiez gain, lau master ere eskaintzen dituzte, fabrikazioaren, berrikuntzaren, zibersegurtasunaren eta energiaren arloko gai espezializatuekin lotutakoak. 2022 eta 2023 ikasturtean, azken esparru horretan gertatu da berrikuntza nagusia, izan ere, Energia Sistema Adimendunen Masterra jarri da martxan: «energia trantsiziotik eratorritako erronka berriei irtenbideak bilatzeko».
Mondragon Unibertsitateak argi dio, hezkuntza ereduaren ardatz nagusietako bat ikasleen ezagutzak eguneratzea dela- Horretarako, 4 ikerketa taldek egiten dute lan. «Horiek berrikuntza proiektuak garatzen dituzte, inguruko enpresen eskutik, hala nola, energia elektrikoaren, materialen, berrikuntzaren eta fabrikazio teknologien gaietan, betiere eskainitako ingeniaritzekin lotuta».
Gainera, unibertsitateak, behar bezala prestatutako laborategiak eta ekipamendu teknologikoa ditu, ikasleek praktikak, proiektuak eta ikerketa jarduerak egin ahal izan ditzaten, fase guztietan: gradua, masterra eta doktorego-tesia.
Mondragon Unibertsitateak eskaintza akademiko oparoa du Orona Ideo kanpusean. Hala nola, aukeran daude Energiaren Ingeniaritzako gradua, Industria Prozesuetako Ekoteknologiako Ingeniaritzako gradua, Energia Sistema Adimenduen masterrak, Industria Ingeniaritzako masterrak, Enpresa berrikuntza eta proiektu zuzendaritzako masterrak, eta Zibersegurtasuneko masterra.
Horrez gain, Mondragon Unibertsitatea «enpresa errealitatean» murgilduta dagoen unibertsitatea dela ziurtatu dute: «harreman etengabea eta estua baitu inguruko enpresekin».