Elkarretaratzea deitu dute bihar arratsalderako, 18:30etan Zinkoenean, «mugetan gertatzen ari diren eskubide urraketak salatzeko», Amher elkarteak nabarmendu duenez. Izan ere, diote «heriotzak eragiten» jarraitzen duela «mugetako polizia-indarkeriak», eta egoeraren kontra agertuko dira bihar: «Inor ez da ilegala! Mugetan heriotza eta indarkeria polizial gehiagorik ez!». Deialdiarekin bat egin eta bertaratzeko deia luzatu diete herritar guztiei.
Ez da aurreneko elkarretaratzea izango Hernanin, mugetan gertatzen ari dena salatzeko. Uztailaren 1ean, Plazan bildu ziren dozenaka lagun, «Melillako sarraskia» salatzeko, eta mugetako erailketen kontra egiteko.