Gipuzkoako paleta gomazko txapelketa martxan da dagoeneko, eta hernaniarrek asteburu honetan jokatuko dute jardunaldi honetako norgehiagoka. Denera, hiru partidu zeuden aurreikusita, baina nagusien lehenengo mailakoa bertan behera gelditu da. Beraz, bi topaketa izango dira guztira.
Gaur, goizeko 11:00etan hasita, Ane Kerejetak eta Enara Maciciorrek Debako Iruleako bikote baten kontra neurtuko dituzte indarrak, nagusien bigarren mailan. Kiroldegiko frontoian dute hitzordua, eta, aurreko asteburuko martxa bera jarraituz gero, norgehiagoka irabaztea espero da.
Jubenilen mailan, berriz, Iriondok eta Minerrek Intxurre 2 izango dute aurrez aurre. Horiek ere herrian bertan dute partidua, kiroldegian, 11:00etatik aurrera.