Oporrak pasata eta errutinara itzulera xamurragoa egiteko asmotan, Mendiriz Mendik, Ernio erromeriara irteera antolatu du iganderako, gaztetxoekin. Hernanitik irten eta Bidaniako mendatera hurbilduko dira. «Igoera lasai hartuta, Ernioren atzeko aldetik gailurrera igoko gara» nabarmendu dute. Urtero moduan, nahi duenak, gailurrera iritsi baino lehenago aukera izango du burdinezko eraztunak gorputzetik pasatzeko: «usadioak dioenez ona omen da artritiserako eta hezurretarako».
Behin gailurrera igota, Zelatunera jaitsiko dira, eta tarte luze batez bertako giroaz gozatzeko parada izango dute. Ondoren autobusera jaitsi eta herrira bueltatuko dira, eguerdi aldera.
Aldez aurretik izena eman behar da eta bihar da azkenengo eguna
Irailaren 18an, igandean, egingo da irteera, Atsegindegitik abiatuta, goizeko 08:00etan. Izena emateko, edo xehetasun gehiago nahi izanez gero, Mendiriz Mendi elkarteko bulegotik pasa behar da gaur edo bihar ostiralean, arratsaldeko 20:00etatik 21:00etara bitartean. Azkenik, antolatzaileek aditzera eman dute, izena emateko azken eguna bihar izango dela, hilaren 16a hain zuzen ere.