18 urtez azpiko mutilen sei talde aritu ziren lehian, joan den asteburuan, Landaren. Nazioarteko Couth Txapelketaren bigarren edizioa jokatu zuten, bi egunez; eta Donibane Lohizune izan zen txapeldun, finalean Baionako Aviron menderatuta (14-7).
Bi multzotan banatuta ekin zioten txapelketari, sei taldeek: A multzoan Hernani, Sant Cugat eta Donibane Lohizune aritu ziren, eta B multzoan Valladolideko VRAC, Irlandako Temple Carrig School, eta Baionako Aviron.
Maila haundiko topaketa izan da, bigarren edizio honetakoa; eta partidu ikusgarriak jokatu dituzte Landaren. Hernanik ezin izan zuen garaipenik lortu bere multzoan, oso kontrario indartsuen aurrean: 5-17 galdu zuen Sant Cugaten kontra, eta 0-38 Donibane Lohizuneren aurrean. Horrela, bosgarren posturako lehian aritu zen igandean, Temple Carrig School irlandarraren kontra; eta lehia estua izan zuten. Azkenean, irlandarrek lortu zuten garaipena (12-14), eta seigarren bukatu zuen Hernanik.
Multzo bakoitzeko bigarren sailkatuak, berriz, hirugarren posturako lehian aritu ziren: Sant Cugat eta VRAC. Kataluniarrek lortu zuten garaipena, partidu estua jokatuta haiek ere (19-14). Eta torneoa bukatzeko, finala jokatu zuten Lapurdiko bi taldeek, beraien multzoko aurreneko postuan sailkatu ondoren. Sekulako maila erakutsi zuten biek, eta Donibane Lohizunek lortu zuen garaipena, azkenean.