Bihar arratsaldeko 19:00etan bukatuko da itxaronaldi luzea, Latsunbeberri eta Marieluts auzoetan. Hiru urtez festarik gabe egon ondoren, goxo hartuko dute jaien hasierako suziri hotsa, auzotarren belarriek. Eta ez dira nolanahi bueltatuko, bi auzoetako jaiak, hiru eguneko programa potoloa prestatu baitute.
Bihar bertan, txupinazoaren ondoren, izango dira ipuin kontalaria (19:00-20:00), Jenny Perlazarekin aerorunba saioa (20:00-21:00), sardin-jate herrikoia (20:30), eta Txingudiko disko jartzaileen musika saioa (21:30-02:00), asteburuko festa haundiaren iragarle. Izan ere, larunbatekoa eta igandekoa izango dira jaietako egun nagusiak. Denetik prestatu dute larunbaterako: buruhaundiak, apar festa, txaranga, paella-jatea, esku pelota, mus, ping-pong eta toka txapelketak, bingo herrikoia, zezensuzkoa...
Eta igandean, esku pelota txapelketaren finalekin batera, bi klasiko izango dira jaien bukaerari saltsa jarriko diotenak: patata tortilla txapelketa eta sagardo dastaketa.