Joan den larunbatean jokatu zen euskal presoen eta iheslarien aldeko Futbol 7 Txapelketa. Inoizko partaidetzarik altuenarekin, sekulako giroa izan zen goizeko txapelketan zein ondorengo bazkarian.
25 taldek parte hartu zuten partiduetan, eta, denera, 260 partaidek zapaldu zuten Zubipeko zelaia. Zurtidoz Artiatz izan zen garaile, eta Txispas B.P. taldeak lortu zuen bigarren postuan sailkatzea.
Tilosetako bazkarian, berriz, 300 lagun batu ziren, eta ederki bazkaldu zuten elkarrekin jai-giroan. Ondoren, festa izan zen Luzianorekin eta kale buelta musikatuarekin.
«Erraz ahaztuko ez dugun egunagatik», antolatzaileek eskerrak eman dizkiete parte-hartzaileei, eta bolondresei zein musutruk sariak eman zituzten herriko jatetxeei, sagardotegiei, komertzioei eta dendei. «Itzuli behar ez dugun eguna heldu arte, jo ta ke!».