25 taldek hartuko dute parte gaur, Hernaniko Zubipe futbol zelaian, berreskuratu duten Futbol 7 Txapelketan. Inoizko partaidetzarik haundiena izango du txapelketak, gaurkoan. Presoen babeserako da torneoa, eta lagunarteko lehia bizia espero da, baina beti festa giroan.
Txapelketa egunean, hala ere, dena ez da kirola eta lagunarteko lehia izango. Izan ere, egun osoko egitaraua prestatu dute antolatzaileek. Futbol 7 Txapelketa bera goizean jokatuko da, Zubipeko zelaian. Goizeko 08:30etan jarri dute zita, izena eman dutenen artean multzoak osatzeko, eta txapelketa ordu erdi beranduago hasiko dela aurreikusi dute, 09:00ak aldera.
Gero, bazkaria egingo dute Tilosetan, eta arratsaldean musika eta jai giroa izango dira nagusi. Batetik, Luziano Showren kantaldia izango da; eta bestetik, arratsaldean zehar, Kaxkoan barrena kale buelta musikatua antolatu dute.