Bazkizopa Jaialdiaren bigarren edizioa antolatuko da gaur Hernanin. Urbieta kaleko kioskoan izango da festa, arratsaldeko 19:30etan hasita. Gainera, musikaz gain, jateko eta edateko aukera ere izango da.
Oraingo honetan, hiru kontzerturekin gozatu ahal izango da: Acto Messie, Nizuri Tazuneri eta Minet Euskoprincess. Denetarik izango da, beraz, jaialdian. Hondarribiako Acto Messierekin rap-a entzuteko aukera izango dute ikus-entzuleek, Nizuri Tazuneri taldeak rap eta musika elektronikoa eskainiko du eta, azkenik, Minet Euskoprincess hernaniarrak dancehall eta trap generoetako erritmoak aurkeztuko ditu, besteak beste. Berezia izango da, gainera, Minet-en aurkezpena. Izan ere, Urumea bailaran aski ezaguna bada ere, gaur lehenengo aldiz oholtzaratuko da bere herrian, Hernanin.
BazkiZopa 2021garren urtean sortu zen, zenbait musikari lagun batuz, eta, oraingoz behintzat, hiru hernaniarrek osatutako elkartea da.
Hasiera batean, kontzertu soilak antolatzeko sortu zen BazkiZopa, baina taldekideek erabaki zuten modu jasangarri batean oinarritutako elkartea izango zela: «Kontzertu soilak antolatzeaz gain, modu jasangarri batean bizi nahi genuen hau egiteko prozesua, eta honela topatu genuen modua».