Udako hilabeteetan murgilduta egotearekin batera, Udal kiroldegiak prest du, dagoeneko, 2022-2023 ikasturteko ikastaro-eskaintza. Igerilekuko, fitness aretoko eta aire libreko ikastaroak dira, adin tarte guztietako herritarrentzat. Ikastaro gehienak urte osokoak izango dira eta, horrez gain, uretako batzuk, berriz, hiru hilabeteko iraupena izango dute.
Izena emateko interesa dutenek, zabalik dute apuntatzeko epea. Irailaren 11 izango da horretarako azken eguna, kiroldegira bertaratuta edo, bestela, Internet bidez www.kirola.hernani.eus webgunean.
Aurtengoan, aurreratu dutenez, azken urteetan eskaini diren ikastaroez gain, «zenbait berrikuntza» txertatu dituzte. Eskaintza aztertuta, denetarik egiteko aukera izango dute herritarrek.
Ikastaroak antolatzeko, hiru multzo osatu dituzte. Batetik, uretako ikastaroei dagokienez, adin-tarteka banatuta, talde bakoitzak bere eguna eta ordutegia izango du. Bestetik, aire librekoak bi izango dira: Jarri martxan! (60 urtetik gorakoentzat) eta Herrian barrena. Azken horretan, esaterako, korrika, zirkuituak eta bestelako jarduerak osatuko dituzte Hernaniko kaleetan barrena. Azkenik, fitness aretoan 18 ikastaro eskainiko dira. Denetarik egiteko eta lantzeko tartea izango da horietan: indoor walking-a, korea, zunba, TRX-a, aerobikoa, eta beste asko.
Zenbait ohar
Ikastaro guztien gaineko informazioa eskuragai dago kiroldegiko webgunean. Aintzat hartzekoen artean dago, adibidez, pertsona bakoitzak eskaera bakarra egin ahal izango duela. Gainera, eskaera-orri bakoitzean bi ikastaro desberdin izendatzeko aukera izango da, lehen ikastaroan plazarik egokitu ezean, beste ikastaro batean aukera izateko.