Atzo, sekulako arratsaldea igaro zuten Udaparkean egitasmora bertaratu zirenek. Etxeko txikiek, naturarekin jolasteko aukera izateaz gain, Bidearen amaieran antzerkiarekin ere gozatu ederra hartu zuten, familia giroan; eta gauean, Aukeran dantza taldearen Hurrengo geltokia ikuskizun ederrak Ave Maria argitu zuen.
Gaur Udaparkean egitasmoko bigarren eguna izanik, arratsaldetik gauera bitartean, hainbat ekintza egingo dira. Hasteko, arratsaldeko 16:00etarako, Bubbles jolasa antolatu da. Eta 17:00etan, berriz, haurrentzako jolasak hartuko du nagusitasuna. Ekojolasak izango dira hauek, Plisti-plastak dinamizatuta. Tailer hau, material natural desegituratuekin hornitutako txoko ezberdintasunaz osaturik dago. Arratsaldeko 20:30etan, berriz, Rojo Telon taldeak, Nudo izeneko emanaldi ikusgarria eskainiko du, bertaratzen direnei aho zabalik uzteko asmotan. Eta gaurko ekintzei amaiera emango die Neomak taldeak eskainiko duten kontzertuarekin, 22:00etan hasita.
Bihar, Udaparkean egitasmoaren azken eguna
Bihar izango da 2022ko Udaparkean egitasmoaren azken eguna, eta lau jarduera antolatu dira, larunbata behar bezala ospatzeko. Arratsaldeko 17:30tan, hartubolean ariko dira Goiz Eguzkiko helduak, kiroldegian, eta bertaratzeko deia luzatu dute. Horrez gain, arratsaldeko 19:00etan, Yarleku taldeak, Numenak izeneko haurrentzako antzerkia eskainiko du. Behin Yarlekuk emanaldia amaituta, Zirkua-Clowni emango zaio hasiera, Mortelok eta Manzinik eskainiko dute, Fili Busters izeneko emanaldi ederra bezain ikusgarria. Eta Udaparkean egitasmoari agurra emateko, Dupla taldea oholtzaratuko da Ave Maria parkean, gaueko 22:00etan. k