Hitzordu berezia daukate Portuko auzotarrek ostiral honetan; bereziki, etxeko txikienek. Izan ere, Pirata Garrapataren abenturak emanaldiaz gozatzeko aukera izango dute arratsaldean, Patata Tropikala konpainiaren eskutik. Ibarrolaburu plazan eskainiko du emanaldia Garrapata piratak, 18:30etan hasita.
Ohi bezala, kultur ekintzak antolatzeari ekin dio Portuko Auzo Elkarteak, udarako oporraldirako. Eta Udan kulturaz blai egitasmoaren baitan prestatu dute ostiralekoa, haur eta gaztetxoei zuzendutakoa.
Antzerkia, magia eta txotxongiloak uztartuko ditu emanaldiak, eta horiek baliatuko ditu Garrapata piratak, gai jakin bati buruz hitz egin eta hausnartzeko: kutsadurak itsasoan duen eragina. 4 eta 8 urte bitarteko haurrei zuzendutako emanaldia da, bereziki.