Aurreko astean aurkeztu zuen Hernaniko Udalak, CD Hernanirekin eta Hernani Club Rugby Elkartearekin batera, bi kirol zelaietan uholde arriskua murrizteko proposamena. Horren harira, URA Agentziak Kronikari azaldu dio, oraindik ez duela proposamen horren berri: «gaur egun, ez da dokumenturik erregistratu Uraren Euskal Agentzian, eta ez da kontsulta ofizialik egin».
Edonola ere, URAk gogorarazi du, kirol eremua «10 urteko errepikatze-denborako uholde arriskua duen eremuaren barruan dagoela. Kirol eremuari lotutako instalazioei ere eragiten die uholde muga horrek, eta Urumea ibaiaren lehentasunezko fluxu-eremuak dira».
Zubipe eta Landareko instalazioak babesteko, hormaren eraikuntza «bultzatzeko borondatea» erakutsi duela azaldu du URAk, baina Euskal Agentziak ezarritako irizpidea «beti» izan dela berbera: «ondorioztatu dugunez, planteatutako babes-harresiak ur-geruza nabarmen igotzea eragingo luke, bai hormak defendatzen duen eremuan, bai hormatik gora, eta etxe zein industria eraikuntzei eragingo lieke. Beraz, historikoki, horma eraikitzearen aurka agertu izan da URA, horrek sortuko lukeen ur-geruzaren goratzea onartezina baita, hain arrisku haundiko ibai zati baten testuinguruan. Beraz, Hernaniko Udalaren proposamenak ez du URAren oniritzirik. Hidraulikoki, desegokia da horma haunditzea, ez bakarrik elementu oso kalteberak babesten ez dituelako, baizik eta, gainera, eragiten duen gaingoratzea esanguratsua delako ingurunean, arrisku egoera areagotuz».
Edozein kasutan, URAk berretsi du oraindik ez duela proposamen berria jaso, eta beraz, jakinarazi du ez duela «horri buruzko adierazpenik egingo, dokumentazioa erregistratu eta aztertu arte».