Irribarre zabalarekin eta zilarrezko domina kolkoan zuela bueltatu da Xuban Santin hernaniarra, Finlandiako Pajulahti herritik. Gazteentzako Europako Paralinpiar Jokoetan hartu du parte bertan, boccian; eta bigarren sailkatu da, BC2 kategorian.
Ligaxkan ekin zion hernaniarrak, eta A multzoan aritu zen, Pangiotis Paschos greziarrarekin eta Florian Witt alemaniarrarekin batera. Aurreneko partidan, 3-1 menderatu zuen Witt; eta bigarrenean, Paschosekin 2-2 berdindu ondoren, greziarra nagusitu zen desenpatean. Edonola ere, multzoko bigarren postua lortuta, semifinaletara sailkatu zen Santin.
Jan Hatak txekiarra izan zuen aurrez aurre orduan, eta 2-2 berdindu zuen berriro; baina oraingoan, berak irabazi zuen desenpatea, eta baita final haundirako txartela ere. Partida erabakigarrian aurrean izango zuena, ordea, ez zen edozein: aukerarik ez zion eman David Pinto portugaldarrak, eta 6-1 nagusitu zitzaion. Edonola ere, txapelketa borobila jokatuta, zilarrezko domina jaso zuen Santinek, podiumean.