Bi sari irabazi ditu Iñigo Legorburu idazle hernaniarrak. Maiatza bukaera aldera, jaso zuen Legorburuk hamaikagarrenez bertso sorta onenaren saria, 'Bisitaria' lanarengatik, XIX. Lurretako Literatura Lehiaketaren barruan. Lehenengoz 2012garren urtean parte hartu zuen bertan irabaziz, eta ordutik, urtero parte hartu du irabazle izanez. Aurten ere, 200 euroko bonoa irabazi du Durangoko Hitz liburutegian xahutzeko eta bere idazlana argitaratua ikustea lortu du. Aurtengo bertso-sorta, etxegabetze baten ingurukoa izan da, 'Bisitaria' izena hartu duena: «desjabetze agindu batekin datorren polizia bikotea da eta fikziozko protagonista baten ahotik egindako bertsoak dira», dio Legorburuk. Bertso honetarako erabilitako doinua Xabier Silveiraren ETAren su-etenetik melodia da: «oso aproposa istorio luzeak kontatu eta atmosfera bat lortzeko», azpimarratu du Legorburuk.
Idazle hernaniarrak, aurrera begira, parte hartzen jarraitzeko asmoa du, denbora eta ideiak edukiz gero behintzat: «beti da plazera Joseba Sarrionandiaren herrira bisita egitea eta Kristina Mardaras bertsolari haundia eta aurkezlearekin tertulian aritzea. Soilik horregatik, ahaleginak merezi du».
'Kontatu bihotzarekin' ipuin lehiaketan, bigarren
San Joan egunez eman zituzten jakitera Barakaldoko Clara Campoamor kulturetxean ACAPKek antolatutako ipuin lehiaketako irabazleak. Bertan Legorburuk 'Fatimaren eskutik' lanarekin bigarren saria lortu zuen. Adierazi duenaren arabera «emozio haundiko uneak» bizi izan zituen. «Pandemiak geldialdia ekarri zuen, eta bi urteren ostean, ACAPKeko korua berriro bildu zen». Legorbururen ipuinak, arrazismoa, aurreiritziak eta topikoak ditu hizpide eta Irungo Harrera Etxean kokatzen da istorioa, Fatima migratzailea haurdun iristen denean bertara. Handik aurrera, Fatima eta abokatuaren artean harreman berezi bat sortuko da.
Egileak, 250 euroko saria eta diploma eskuratu zituen eta bi egile sarituek, euren obrak liburu formatuan argitaratuta ikusiko dituzte, beste finalista zein sarituekin batera.
Hona hemen Legorbururen 'Bisita':
DOINUA: ETA-ren su etenetik... (X. Silveira)
1
Apaldu nahian etxeko
sarrailaren giltza-hotsa
“egunon!” ozen batean
altxa berri dut ahotsa.
Amak eztu mespretxatu
kulebroiaren morrontza,
ta aitak sofatik bota
dit begirada zorrotza.
Ongi-etorri bat nola
izan liteke hain hotza?
Arduraturik erabat
galdezka daukat bihotza
gure etxean zergatik
sentitzen naizen arrotza...(BIS)
2
Erositako pisu bat
da partekatzen duguna
langile auzo batean,
umila eta kuttuna.
Gure sendia auzoan
betidanik ezaguna
izan denez, jaso dugu
auzotarren maitasuna.
Iraganak baldintzatzen
digunez etorkizuna
ezin beterik gabiltza
gure erantzunkizuna
pisuaren zama guztiz
bilakatzean astuna.(BIS)
3
Hiruzpalau hilabete
badira dagoeneko
dirurik ez daukagula
mailegurik ordaintzeko.
Bi guraso elbarrien
egoera hau tarteko
diru-sarrera nahikorik
ez daukagu bizitzeko.
Zorretan murgildu gara
interes-tasen menpeko
pentsatu izan dut nik maiz:
“Hilko bagina hobeto!”
izendatu zutenetik
injustizia legezko.(BIS)
4
Sukaldera abiatu
naiz nire kasa, hurrena
trastez beterik aurkitzen
den pasiloan barrena.
Maletak, arropak, poltsak...
kaosa da nabarmena
baina ez al da sobre bat
lurrean ikusten dena?
Banketxearen gutuna,
aidanean seigarrena,
irakurri dudanean
akabo itxaropena!
Zenbakitan azaltzen da
hitzez esan zigutena.(BIS)
5
Beraz oroitzapenetan
murgildu naiz berehala:
bere horretan mantentzen
da garaikurren apala,
polita da sendiaren
argazkiaren murala,
familiaren armarri
hilezkorraren itzala...
Bankuari berdin dio
bizi dugun martingala
ezer ez sentitzea da
haientzako naturala...
Etxeak, lau horma xixtrin
soilik balira bezala!!(BIS)
6
Txirrinaren “requiem”-a
gogoz hasi da kantari
eta aurpegia guztiz
zurbildu zaio amari.
Lasaitasunezko soa
igorri diot aitari,
hark ordea begirada
hiltzatu dio lurrari.
Berriro ere txirrinak
jo duenean, jostari
atea zabaldu eta
hortxe ikusi dut garbi
leiho bat itxi zaiola
genuen esperantzari.(BIS)
7
Polizia ikustean
ez naiz harritu gehiegi
soilik bi etorri dira,
beraz orduan gaitzerdi!!
Erakutsi dizkidate
lau inprimaki orlegi
eta esan “kanporatu
zaituztete, beraz segi!!”
Egunero ikustean
antzeko mila miseri
pozik biziko direnik
ez zait iruditzen neri
legezkoa den guztia
beti ez baita zilegi.(BIS)
8
Stop desjabetzekoek
egina zutenez zita
bat-batean entzun ditut
gure alde garrasika.
Tamalez, gaur horrek ez du
konponduko gure kinka
beraz hirurok atera
gara etxetik, etsita.
Jadanik alferrik denez,
sor liteken ika-mika
gogoz madarikatu dut
nire begiak itxita
inoiz ongi-etorria
izango ez den bisita.(BIS)