EAJko bozeramaileak argi utzi nahi izan du alderdi jeltzaleak duela hilabete batzuk eskatu zuela futbol eta errugbi klubekin adostutako hitzarmenaren zenbatekoa murriztea: «hitzarmenaren arabera, 2 milioi euro blokeatzen ziren instalazioak hobetzeko eta zelaien uholde-arriskua murrizteko. Hobekuntzak duela urte batzuk egin behar ziren, baina ez da ezer egin. Uholde arriskuari dagokionez, ohartarazi genuen URAko teknikariekin harremanetan jarri ginela, eta ziurtatu ziguten ur-goraldietan, ibaiko ura kirol eremuetan sartzea galaraziz gero, bizilekuak edo industria-eremuak urez beteko zirela. EH Bilduk agiri bat eskatu zigun, eta ez telefono dei bat; dokumentu hori iritsi da».
Hau kontutan izanik, Amonarraizek, EAJk egindako kontsulta bati erantzunez, URAk egindako dokumentuaren laburpena egin du: «2022ko urtarrilaren 26an, Hernaniko Udala Uraren Euskal Agentziarekin (URA) bildu zen, kirol-eremuaren inguruko horma-irudi perimetrala handitzea bideragarria ote zen planteatzeko; baina ez zegoen ondo definituta. Uraren Euskal Agentziak (URA) Udalari planteatu zion informazio zehatza jasotzen zuen kontsulta bat aurkezteko. Eskaera hori oraindik ez da gauzatu (2022-06-16). 2015ean, Hernaniko Udalak ZL.04 Landare (Hernani) eremuko uholdeetatik babesteko neurriei buruzko azterlana eman zion Uraren Euskal Agentziari. Azterlan horretan, harresi bat eraikitzea eskatzen zen, eta URAren erantzuna ondorengoa izan zen: defentsa-hormak ur maila modu esanguratsuan handitzea eragingo luke, bai hormak defendatutako eremuan, bai handik gora, eta horrek eragina izango luke bizileku eta industria-eraikuntzetan. EAJ-PNVk egindako kontsulta espezifikoari dagokionez, honako hau izan da erantzuna: kontsultan aipatzen den horma handitzea desegokia da, ez soilik ez dituelako gune ahulenak babesten, baizik eta, gainera, eragiten duen goratzea esanguratsua delako ingurunean, arrisku-egoera areagotuz». Eta alderdi jeltzaleak, txosten horretatik ondorioztatzen du, URAk ezin duela kontuan hartu Landare eta Zubipe zelaiak urez betetzea galaraziko lukeen edozein moldaketa: «bizileku edota industria guneei eragingo liekeelako».
Amaitzeko, Amonarraizek gaineratu du errugbi eta futbol kluben instalazioak, zein beste kirol kluben instalazioak oihuka ari direla hobekuntza bat eskatzen: «kea saltzeari utzi eta 2 milioi horiek kluben instalazioetan inbertitu behar dira. Udalak ezin du esan Landarera eta Zubipera ura sartzea ekiditeko zerbait egin dezakeenik». EAJk uste du belar artifizialeko beste zelai bat eraiki beharko litzatekeela paper fabrikaren ondoan, «uholdeen garaietan zelai bat ziurtatuz».