Bereziki haurrei zuzendutako jaia antolatu du Zelabide Auzo Elkarteak, bihar arratsalderako: Udako Festa ospatuko dute Gabriel Zelaia plazan, 18:00etan hasita, goizaldera arte.
Pailazoen emanaldiarekin emango diote hasiera festari, 18:00etan. Bertan izango dira Txintxeta, Klipa eta Txorroskilo pailazoak, auzotarren irriak atera eta familia giroa zabaltzeko prest. Ondoren, Laiotz taldea izango da, denak dantzan jarriko dituena. Bi txandatan joko du Laiotzek, Gabriel Zelaian. Lehenik, haurrentzako dantzaldia eskainiko du, iluntzeko 20:30etan hasita. Ordu eta erdiko emanaldia izango da, eta 22:00ak aldera bukatuko da.
Helduentzako dantzaldia, goizaldera arte
Ordubetez atsedenerako tartea hartu ondoren, gazte eta helduei zuzendutako dantzaldia eskainiko du Laiotzek. Gaueko 23:00etan hasiko da hori, eta bi ordu eta erdikoa izango da, goizaldeko 01:30ak arte.
Gainera, Zelabide Auzo Elkarteak jakinarazi duenez, txosna ere jarriko dute Gabriel Zelaia plazan bertan, jatekoarekin eta edatekoarekin. 17:30etan irekiko dute txosna, eta ogitartekoak eskainiko dituzte 20:00etatik aurrera, etxera afaltzera joan beharrik ez izateko.