Gipuzkoako Traineru Txapelketa izan zen joan den igandean, Hondarribian, 11:00etan hasita. Hantxe izan zen Maialen trainerua, bi urteko geldialdiaren ostean. Denera, bederatzi taldek parte hartu zuten, eta azken postuan amaitu zuen Hernanik, 11:47,46 denborarekin. Hala ere, klubetik nabarmendu dute «lan txukuna» osatu zutela arraunlariek. Beraz, lanean jarraitzea besterik ez da gelditzen. Aurreko asteetan aipatu dutenez, «buru-belarri» ari dira lanean, eta martxa bera jarraituko dute prestakuntza lanean.
Hernaniarrak beste hainbat taldetan, Gipuzkoakoan
Txapelketan parte hartu zuten zenbait taldetan ere badira arraunlari hernaniarrak. Eider Barbak lehenengo postua lortu zuen Oriorekin, 10:44,64 markarekin. Donostiarrarekin, berriz, Uxue Alberdik egin zuen arraun, eta laugarren amaitu zuen sailkapenean, 10:57,44 denborarekin. Hibaikak bosgarren egin zuen, 11:09,02 denborarekin, eta traineru horretan ere badaude hernaniarrak: Garazi Arabiatorre, Jone Pastor eta Ihintz Larrañaga. Azkenik, Hondarribian daude Miren Garmendia eta Maider Perez, eta seigarren bukatu zuten, 11:15,76ko markarekin.