Ekaineko kultur agendaren barruan, emanaldi berezia izango da etzi, hilaren 14an, Biterin. Hain zuzen, ikasturte honetan kultur etxean eskaini dituzten ikastaroen ikuskizunak antolatu dituzte egun horretarako. Dantza garaikidea eta antzerkia landu dituzten taldeek ikasturte honetan ikasitakoa aurkeztuko dute oholtza gainean.
Arratsaldeko 19:30etan jarri dute horretarako zita. Antzerkiko pieza eskainiko dute aurrena eta, gero, dantza garaikideko taldearen txanda izango da. «Inprobisazioa abiapuntu hartuta sortutako pieza laburrak aurkeztuko ditugu», kontatu dute arduradunek. Horrekin, bertaratzeko deia luzatu diete herritarrei.