Hernani Eskubaloi Taldeak Zuzendari Tekniko berria du: Goyo Villoria donostiarra. «Eskarmentu haundiko entrenatzailea da eta, oraingoan Hernanin, gure klubean, erronka berriari hasiera emango dio», aipatu dute klubeko ordezkariek.
«Eskubaloian daramatzan ia 40 urteko ezagutza eta esperientzia laburtzea ez da erraza, bere curriculuma oso luzea baita», nabarmendu dute Villoriaren aurkezpenean. Formazio aldetik, besteak beste, Eskubaloi Entrenatzaile Titulu Nazionala du, eta Espainiako Eskubaloi Federazioak antolatutako hainbat Nazioarteko Mintegitan ere diplomatua da. Gainera, entrenatzaile lanetan aritzeaz gain, zuzendaritza teknikoko postuetan ibilitakoa ere bada, besteen artean, C.B. Egian, Anglet Biarritz Olympiquen eta Eskubaloi Euskal Federazioan.