Hernani Errugbi Elkarteak datorren ostegunetik igandera bitartean Garagardo Azokaren 18garren edizioa antolatuko du Atsegindegin. Jan edanaz gain, musika ere izango da, eta larunbatean, errugbi barneratzaile txapelketa eta sari banaketa.
Inaugurazio ekitaldia ekainaren 9an, ostegunean, 19:30etan egingo da, eta bertan, urteko balorazioa eta datorren denboraldiko erronken berri emango dute. Baina garagardoak dastatzen hasteko aukera arratsaldeko 18:00etan irekiko da, bai ostegunean eta baita ostiralean, ekainaren 10ean, ere. Era berean, sukaldea 19:30etan irekiko da arratsaldeetan eta 13:30etan larunbatean, ekainaren 11n, eta igandean, ekainaren 12an. 23:00ak arte eskatu ahal izango da jatekoa. Itxi, berriz, egunero, gaueko 00:00etan dago aurreikusita.
Larunbat eta igandean, bestalde, eguerdiko 12:00etan irekiko dira barrak, eta sukaldea, 13:30etatik 15:30etara eta 19:30etatik 23:00etara.
Musika, zozketak eta zezen mekanikoa
Ekainaren 10ean, ostiralean, DJ Flanker-ek musika eskainiko du 21:00etatik aurrera, azoka itxi arte. Ekainaren 11n, larunbatean V. Inklusibo Txapelketaren sari banaketa izango da, 19:00etan. Eta ekainaren 12an, igandean, 19:00etan Berriak Elkarteko merkatari eta ostalarien produktuei esker zozketa haundia antolatuko da.
Aurtengo beste berrikuntza zezen mekanikoa izango da. Azken egunean, igandean, 16:00etatik aurrera jarriko dute martxan eta arratsaldea animatzeko DJ Kriscle-k musika jarriko du.
Kronikakideen artean, bi lagunentzako otordua
Bestetik, Garagardo Azoka ireki aurretik, Kronikan, bi lagunentzako otordua zozketatuko da Kronikakideen artean.