Beste garaipen bat lortu zuten Aritz Zubiri goizuetarrak eta Javier Urrizak, astelehenean, Sagardoaren Txapelketan. Larre Gain sagardotegiko ordezkariak 30-17 nagusitu ziren, Bereziartuako Aldaberen eta Larrañagaren kontra; eta horrekin, aurrerapauso haundia eman dute, semifinaletara sailkatzeko. Jokatutako bi partiduak irabazita, 8 punturekin hirugarren daude sailkapenean. Aurretik dauzkate Oialume Zarreko Endika Barrenetxea hernaniarra eta Ander Goikoetxea, 9 punturekin, hiru partidu jokatuta; eta Petritegiko Segurola eta Azpiroz, 8 punturekin, hiru partidutan.
Hain justu, garaipena lortu zuten Segurolak eta Azpirozek, asteleheneko jaialdiko beste partiduan: 30-29 irabazi zieten Gurutzeta Ezkurrari eta Zalduari.
Sailkapeneko azkeneko hiru postuetan daude honakoak: Ansa II eta Juanenea (Setien), 6 punturekin, bi partidu jokatuta; Ezkurra II eta Zaldua I, 6 punturekin, hiru partidu jokatuta; eta Aldabe eta Larrañaga, punturik gabe, hiru partidu jokatuta. Ligaxkako lau bikote onenek egingo dute aurrera.