Hiru urtez itxaron ondoren, bueltan izango dira Osiñagako Jaiak. Maiatzaren 29an, arraunak berotuko ditu motorrak, Elorrabin; eta ekainaren 4a eta 5a izango dira festetako egun potoloenak, mota guztietako ekintzekin.
Hernaniko Arraun Elkarteko gazteak izango dira protagonista, maiatzeko azkeneko igande horretan. Izan ere, batel estropada jokatuko dute Elorrabin, goizeko 11:30etan hasita.
Egitarau bete-betea, ekaineko aurreneko asteburuan
Estropada jokatu, eta hurrengo asteburuan ospatuko dituzte auzoko jaiak. Larunbatean, bizikleta bira egingo dute auzoan zehar, eta txupinazoaren eta haurrentzako jolasen ondoren, bazkaria egingo dute auzotarrek. Egunaren bigarren zatia, berriz, ezin konpletoagoa: herri kirolak, bertso saioa, sagardo dastaketa, auzo afaria, eta dantzaldia Laiotzekin.
Potentea izango da igandea ere, Osiñagan. Hasteko, segalarien arteko lehia izango da eguerdian, eta Unai Agirre eta Aitor Mendiluze bertsolarien saioa ere bai. Bazkari herrikoia egingo dute ondoren, eta pelota partiduekin borobilduko dute festa.
OSIÑAGAKO JAIAK 2022
MAIATZAK 29, igandea
11:30, Hernaniko Arraun Elkarteko gazteen batel estropada, Elorrabin.
EKAINAK 4, larunbata
10:30, Bizikleta bira auzoan zehar. Ondoren, hamaiketakoa Harriatsun, partehartzaileentzat.
12:00, Txupinazoa eta haurrentzako jolasak.
14:00, Bazkaria, auzokoentzat.
18:00, Herri kirolak: Lierni Osa eta Lur Errekondo harrijasotzaileak; Suharri Rodriguez Paolla eta Jokin Urretabizkaia Basozabal aizkolariak; eta Aiert Paolla, Xabat Arruti, Iraitz Arruti eta Leku giza proban.
Ondoren, Bertso saioa, Hernaniko eskolako bertsolariekin.
19:30, Sagardo dastaketa.
21:30, Auzo afaria, Harriatsun, Euskal Parrillakoek prestatuta.
00:30, Dantzaldia, Laiotzekin.
EKAINAK 5, igandea
12:00, Julen Gabirondo eta Jon Otegi segalariak.
13:00, Unai Agirre eta Aitor Mendiluze bertsolariak.
14:00, Bazkari herrikoia Harriatsun, Euskal Parrillakoekin.
18:00, Gazteen pelota partiduak.
Segidan, Nagusien pelota partiduak.
Ondoren, Unai Agirre eta Aitor Mendiluze bertsolariak.