Langile ikastolako ikasle ohien batzordeak bultzatuta, datorren maiatzaren 28an igandean, ospatuko dute Langile Ikastolako ikasle ohien jaia edo eguna, ikastolaren 50. Urteurrenaren harira. 50+2 eta aurrera!
Langile ikastolako 800 ikasle ohi bilduko dira hilaren 28an eta egun osoko egitaraua antolatu dute: Eguerdiko 12:00etan izango da hasiera ekitaldia Tilosetako kioskoan, jarraian argazki erraldoia aterako da Gudarien Plazan eta bertatik, Hernaniko Sagardotegi ezberdinetara abiatuko dira bapo bazkaldu eta kintaka txotx eta topa egiteko. 1968-1973 bitartean jaiotakoak, Itxas-Burun; 1974-1976 bitarte, Olaizolan; 1980-1988 bitarte, Elorrabin; 1989-1996 bitarte, Iparragirren; 1997 eta 1998 urtekoak, Akarregin; eta 1999-2001 artekoak, Otsua-Enean.
Bazkari ostean, musika
Bazkariaren ostean berriz, musikaz betetako arratsaldea antolatu dute. 19:00etan Karabeleko Zubialde tabernatik abiatuta Zuttik Elektrotxarangak alaituko ditu kaleak eta ospakizun egunarekin amaitzeko asmoz, 21:00etatik aurrera, Kuzerni MJ-DJen eskutik euskal hit eta bailableak entzungai izango dira Tilosetan.
Pandemiaren eraginez, 50. urteurrenean, ezin izan zen honelako jairik antolatu, baina orain posible da.