Alemaniako Essen hirian izan da Aitor Lizarazu hernaniarra, asteburuan. HYROX Fitness Race txapelketan hartu zuen parte larunbatean, eta maila ederrean, gainera: bigarren postuan sailkatu zen Denontzat taldeko kidea, 1:04:46 denborarekin; eta onena izan zen bere kategorian, 30-34 urte artekoetan.
Probako sailkapen nagusian, Nils Stuber alemaniarra izan zuen aurretik, 1:02:18 denbora eginda. Elte Hupkes alemaniarrak osatu zuen podiuma (1:05:50). 30-34 urte artekoen podiumean, berriz, Lizarazuk alboan izan zituen Hupkes bera, bigarren; eta David Blankenburgh herberehetarra, hirugarren.
Europara egindako bigarren bidaia du Lizarazuk, horrelako proba bat lehiatzera; eta aurreneko esperientzia ona izan bazen, are hobea izan da oraingoa.
Emaitza honekin, gainera, Munduko Txapelketa jokatzeko txartela eta gonbidapena lortu du Aitor Lizarazuk, datorren astean Estatu Batuetako Las Vegas hirian jokatuko dena. Hernaniarra ez da bertan izango, ordea, Munduko Txapelketan parte hartzeari uko egin baitio. Azaldu duenez, nahiago du «esperientzia gehiago» hartu horrelako probetan, eta aukera izanez gero, datorren urtean aurkeztu.