Joan den urtean, ezinezkoa izan zen San Joanak ospatzea. Izan ere, osasun egoerak galarazi egin zuen festak antolatzea. Aurten, ordea, egoera hobetu dela ikusita, San Joanak izango direla aurreratu dute. Horrekin batera, dagoeneko eman dute argitara zein taldek izango duen jaietako bandera igotzeko eta jaisteko egitekoa.
San Joanetako batzordeak jakitera eman duenez, «ibilbide oparoa eta urtemuga esanguratsuak» ospatzen ari diren bi taldek izango dute udaletxearen balkoitik bandera igotzeko eta jaisteko ardura: batetik, Mendiriz Mendi taldeak (75 urte bete zituen joan den urtean); eta, bestetik, Langile ikastolak (50 urte bete zituen 2020an).