Garraiolari bat hil zen atzo goizean Hernanin, kamioi batek harrapatuta. Zikuñaga Papeleraren atzeko bidean gertatu zen ezbeharra, aparkalekuetan. Aparkatuta zegoen beste kamioi bat jo zuen kamioiak, oraindik argitzeke dauden arrazoiengatik; eta erdian harrapatu zuen gizona. Antza denez, istripuaren unean, aparkatuta zegoen kamioiaren atzeko aldean ari zen hizketan, beste pertsona batekin. Bi kamioiek zeramakiten egurra, paper fabrikarako.
Istripua gertatu eta berehala salatu zuten ezbeharra zenbait elkartek, eragilek eta sindikatuk. LAB sindikatuak, zehazki, hauxe nabarmendu zuen atzo arratsaldean: «LABek ez du onartuko Osalanek eta inspekzioak Zikuñagakoa trafiko istripu bezala hartzea euren estatistikak leuntzeko». Ernaik, bere aldetik, salatu du «lan prekarietatea dela hiltzailea». Buruntzaldeako Kontseilu Sozialistak, berriz, argi utzi zuen bere mezua: «kapitalismoa hiltzailea».
Kontzentrazioa, gaur
Hernaniko Ezker Abertzaleak ere gertatutakoa salatu du eta, horren haritik, salaketa kontzentrazioa antolatu du gaurko. 18:30etan izango da, Zinkoenean. «Ez da zoria, prekarietatea da, istripu berri hau guztiz ekidin zitekeen», adierazi dute.