Garraiolari bat hil da gaur goizean Hernanin, kamioi batek harrapatuta. Zikuñaga Papeleraren atzeko bidean gertatu da ezbeharra, aparkalekuetan. Aparkatuta zegoen beste kamioi bat jo du kamioiak, oraindik argitzeke dauden arrazoiengatik; eta erdian harrapatu du gizona. Antza denez, istripuaren unean, aparkatuta zegoen kamioiaren atzeko aldean ari zen hizketan, beste pertsona batekin. Bi kamioiek zeramakiten egurra, paper fabrikarako.
Istripuaren momentuan bertan hil da gizona, aditzera eman dutenez. Hernaniko udaltzainak, ertzainak eta Osalaneko teknikariak istripua izan den tokira gerturatu dira, eta oraindik bertan daude gertatutakoa argitzeko asmoz. Aparkalekuen ondoko oinezko bidea itxi dute, bitartean.