XIII. marrazki erakusketak eta Maite Larbururen kontzertuak irekiko dute agenda

Maiatza ate joka dugu dagoeneko, eta etzi emango diote hasiera hilabete honetako kultur agendari. Betiko moduan, denetarik izango da adin guztietako herritarrentzat: antzerkia, zinea, literatura, musika, azokak eta beste asko. Astelehenean, martxan jarriko da Bide Heziketaren bueltako  XIII. marrazki erakusketa. Udaltzaingoak antolatuta, ostiralera arte egongo da ikusgai Biterin, ohiko ordutegian.  

Gainerako ekintzetan murgilduta, musika izango da protagonista hilabeteko agendan. Izan ere, besteak beste, izango dira musika emanaldiak, erromeria eta abesbatzen kontzertuak. Gainera, maiatzaren 21a egun berezia izango da Hernaniko Musika Eskolarentzat. Hain zuzen, Ttakun Ttan Ttakun taldearekin batera, XXXVI. Txalaparta Festa ospatuko dute. Tilosetan izango da festa, eta adierazi dutenez, ordua zehazteke dago oraindik. 

Ostiralean, hilaren 6an, Maite Larburu igoko da oholtza gainera. Hernaniarrak Krak diskoa aurkeztuko du Chillida Lekun, arratsaldeko 20:00etatik aurrera. Joan den urteko irailean kaleratu zuen bere azken lana, eta bere herrian aurkeztuko du. Diskoan, bidelagun izan ditu Carlos Taroncher eta Karlos Arancegui musikariak. Klarinete, baxu eta bateria jotzeko modu ortodoxoei muzin eginez, bihurtuko dituzte klarinete eta baxua gailu elektroniko eta bateria, berriz, perkusio set. Hain justu, gitarra klasikorekin, elektrikoarekin, biolinarekin eta biolarekin lagundu du Larburuk bere ahotsa. Sarrerak salgai daude, 8 euroan, Biteriko leihatilan edo, bestela, online, kultura.hernani.eus webgunean. 

Zinea, erromeria, azoka eta beste asko, hurrengo astean

Ekintza berezia antolatu dute datozen egunetarako. Antziola libguneko kutxen pintura tailerra izango da hilaren 7tik 14ra bitartean. Oihana Insausti begiralearekin, 10:30etatik 12:30etara, margoketa lanetan arituko dira bertaratzen direnak. Informazio gehiago eskuratzeko, bertaratu liburutegira edota Zelabide auzo elkartera. 

Hurrengo asteazkenean, berriz, maiatzaren 11n, Anderea filma proiektatuko dute Biterin, arratsaldeko 19:00etan. Sarrera doakoa da, baina gonbidapena eskuratu behar da aurretik, kultur etxean bertan. Egun horretan, gainera, Iker Valle artistaren margolanen erakusketa aurkeztuko dute Biterin. Hilaren 28ra arte egongo da ikusgai, kultur etxeko ohiko ordutegian. 

Erakusketekin jarraituz, Emakumeen Zentro Soziokulturalak eskulanen erakusketa antolatu du, eta maiatzaren 31n aurkeztuko dute.

Martxa horrekin jarraituz, maiatzaren 14a egun potoloa izango da herrian. Eguerdiko 12:00etan, Tartalo, gaztaren sekretua antzerkia aurkeztuko du Logela multimediak, Biterin, eta sarrerak salgai jarriko dituzte asteartean, online zein kultur etxean. Eguna amaitzeko, hilabeterako erromeria antolatu du San Joan konpartsak. Oraingo honetan, Plaza Berrin izango da, arratsaldeko 18:30etan. 

Bestalde, hilaren 15a egun seinalatua izango da bailarako baserritarrentzat. San Isidro eguna ospatuko dute Hernanin ere, eta egitaraua oraindik aurkeztu ez badute ere, laster emango dute horren berri. 

Bere aldetik, Gaztelekuak ere aurkeztu du hilabeteko egitaraua. Datorren larunbatetik hasita, hamaika egiteko izango dituzte: patata tortila lehiaketa, tatuaje tailerra, mini golfera irteera, ginkana bizikletan, eta beste hainbat ekintza. 

Maiatzaren 21ean, goizean, Behemendik, Dekolorek eta Udalak antolatuta, loreen eta landareen azoka izango da Urbieta kalean.

Ekitaldietarako sarrerak salgai interneten eta Biterin  

Aurkeztutako zenbait ekintzatarako, beharrezkoa izango da aldez aurretik gonbidapenak edota sarrerak eskuratzea. Bertaratzeko modua edozein dela ere, eskuragai eta salgai egongo dira kultura.hernani.eus webgunean edo, bestela, aurrez aurre, Biteriko leihatilan, ohiko ordutegian.