Antzerkiak hartuko du Biteriko oholtza gaur, Album emanaldia eskainiko baitu Formol Laborategiak, arratsaldeko 19:30etan hasita. Sarrerak 8 euroan daude salgai, Biterin bertan eta kultura.hernani.eus webgunean; eta 25 urtetik beherakoek, gonbidapena jaso dezakete Gazteria Arloan (Aristizabal kalea 7), goizeko 09:00etatik 14:00etara.
Intza Alkain, Edurne Azkarate eta Mikel Ibarguren dira antzezleak. Horrela dio aurrerapenak: «asko hitz egin izan da gazteoi buruz. Millennialok oinordetzan hartutako erantzukizunak kudeatu ezinean gabiltzanaren diagnosia jaso dugu. Ondorengo hitzekin definitu gaituzte; infantilak, prekarioak, frustrazioari intoleranteak, grinarik gabeak, bizitzan galduak, gainformatuak. Ados, sintomatologia guzti hori geure gainean zamatuko dugu. Gure belaunaldiaren etiketen jabe bihurtuko gara».