Hirugarren edizioa izango du Euskaraldiak aurten, urte bukaera aldera, azaroaren 18tik abenduaren 2ra. Baina motorrak berotzen ariko dira Hernanin, ordura arte; eta dagoeneko jarri du Euskaraldiaren hirugarren edizio hori aurkezteko hitzordua, Dobera Euskara Elkarteak: datorren ostiralean izango da, arratsaldeko 19:00etan hasita, Atsegindegin.
Irati Sarasuak aurkeztuta, festa giroan egingo dute saioa, Atsegindegin. Izan ere, Kilimak musika taldea arituko da ekitaldia girotzen, euskal runba doinuekin; eta magia ere ez da faltako bertan, Asier Kidam magoaren eskutik.
Aurkezpen ekitaldian emango dituzte aditzera Euskaraldiaren aurreko edizioetako datuak, eta aurrera begirako ekintzak eta jarduerak aurkeztuko dituzte. 2018an izan zen Euskaraldiaren aurreneko edizioa, eta 2020an, pandemiak bete-betean harrapatu zuen arren, bigarrena egin zen.