Covid-19aren pandemiaren garai zailenak gaindituta, berriro ospatuko dute maiatzaren 1a erretiratuek; «hainbeste urtetan lan egin eta gero deskantsatzea dagokigunok». Izan ere, hitzordu berezia jarri du Goiz Eguzkik, egun horretarako: doako luntxaz gozatzeko aukera izango dute maiatzaren 1ean, goizeko 11:00etatik 13:30etara, egoitzan bertan.
Hamaiketako berezira azaldu nahi duten bazkideek, txartel bana eskuratu beharko dute datozen egunetan, doan. Gaurtik izango dute horretarako aukera, apirilaren 27ra arte: Goiz Eguzkira gerturatu beharko dute, arratsaldeko 16:00etatik 18:00etara; eta sarrerako gelan jasoko dute txartela, luntxerako.
Pandemiaren aurretik, urtero ospatu izan dute maiatzaren lehena Goiz Eguzkin, meza eta luntxa eginda; eta ohitura berreskuratuko dute aurten. Ez da aurtengo aurreneko hamaiketakoa izango, dena den: Santo Tomas eguneko ospakizuna atzeratu behar izan zutenez, otsailaren 26an egin zuten txistorrada.