Asteburu potentea izan da, Hernaniko batelentzat, bi zita garrantzitsurekin, Pasai San Juanen. Larunbatean bukatu zuten Gipuzkoako Batel Liga, eta beste behin, maila ederrean aritu ziren hernaniarrak: irabazi egin zuten neska promesek eta absolutuek, eta hirugarren izan ziren mutil promesak. Horrela, ligako txapeldun izan dira neska promesak; bigarren bukatu dute neska absolutuek; eta hirugarren mutil promesek eta neska jubenilek.
Ligako azkeneko jardunaldia ez ezik, Gipuzkoako Txapelketako finaletara pasea ere jokoan zuten, eta Hernaniko lau batel sailkatu ziren: neska zein mutil promesak, txapelketako finala jokatzeko; eta neska zein mutil infantilak, Federazio Saria lehiatzeko, kontsolazio txandan. Igandean izan ziren horiek, eta berriro primeran aritu zen Hernani, denboraldia borobiltzeko: txapeldun izan ziren neska promesak berriro, laugarren bukatu zuten mutil promesek, eta Federazio Saria lortu zuten neska zein mutil infantilen batelek.