Bi urteko etenaren ondoren, hamabostgarrenez, Hernaniko Txistulari Jaialdia antolatu dute Hernani Musika Eskola Publikoko txistulariek eta Euskal Herriko Txistulari Elkarteak. 2020ko martxoan ospatzekoa zen, baina pandemiak eta itxialdiak zirela eta, bertan behera utzi behar izan zen. Aurten azkenik, ederki kosta bada ere, berriro martxan da jaialdi hau.
Asteburuan ospatuko da, bihar eta etzi, eta pandemiaren aurrekoaren antzeko egitarauaz dator. Bihar Txistulari Gazteen Txapelketa izango da Milagrosan eta etzi, igandean, ohiko kalejirak, dianak eta bazkaria izango dira Topaketan.
Bada ordea berrikuntzaren bat: bihar arratsaldean, txapelketako sari banaketarekin batera, kontzertu berezia antolatu da Milagrosan, bi urtez jende aurrean aritzerik izan ez duten txistulariekin. Orain bi urte neska-mutil koskorrak zirenak lanean aritu dira eskolan eta etxe barruan, eta lan horren testigantza edo eskertza izan nahi du kontzertu honek. Durango, Iruñea eta Hernaniko txistulari gazteen taldeak izango dira bertan.
|
EGITARAUA HERNANI BIHAR 11:00 Milagrosa kaperan Hernaniko XV. Txistulari Gazteen Txapelketa. 18:00 Milagrosa kaperan Txistulari gazteen kontzertua. Sari banaketa ere egingo da. ETZI 10:00 Elkartzea eta dianak kaskoan eta inguruko auzoetan. |