Ostegunean aurkeztu zuten Lotura proiektua, Chillida Lekun. Eduardo Chillida-Pilar Belzunce Fundazioak garatu du proiektua, eta La Caixa Fundazioaren eta CaixaBanken babesa du. Proiektu honek, museoa eta gizartea lotu nahi ditu.
Funtsean, esplorazio eta sorkuntza artistikorako eremua izan nahi du, gizarte-bazterketa, pobrezia edo zaurgarritasun-egoeraren bat jasateko arriskuan dauden pertsonentzat. Bitartekari kultural batek edo artista batek dinamizatuko du proiektua, artea, natura eta ongizatea lotzeko helburuarekin.
Proiektuan parte hartu duten pertsonekin lotura eta harreman iraunkorra sortzeko asmoz, bost saiotan egituratutako programa prestatu dute. Proposatuko diren jarduerak horizontaltasunean eta entzute aktiboan oinarrituko dira. Gainera, jarduerak taldean eta elkarlanean egiteko daude diseinatuta.
Jarduera mordoa
Guztira, bost saio antolatu dira. Lehenengo saioan, bisita dinamizatua egingo da Chillida Lekura. Honetan, parte-hartzaileek zentzumenen bidez ezagutuko dute museoa. Bisitan zehar, museoko lanik adierazgarrienak ikusi eta Chillidaren lanen xehetasunak ezagutuko dituzte.
Bigarren saioan, baso-bainuak eta Land Arta landuko dute. Parte-hartzaileek aukera izango dute baso-bainuen bidez natura modu berri bezain ezagunean sentitzeko. Horrela, Chillida Lekuko lorategien gozotasunez gozatu ahal izango dute Itziar Insausti, baso-bainuetan espezializatutako gidariaren eskutik.
Hirugarren saioan, argigrama tailerra egingo da. Nagore Legarreta argazkilariak emango duen tailer honetan, argigrama teknika ezagutuko dute.
Laugarrenean, eskultura habitatzea landuko dute. Myriam Pérez Cazabon koreografoak, eskulturak gorputzaren bidez sentitzen erakutsiko die.
Azken saioan, lurrarekin esperimentatuko dute. Aitor Ruiz de Egino eskultore hernaniarrak, Eduardo Chillidak bere ekoizpen artistikorako erabiltzen zuen material zeramikoa erakutsiko die. Horrela, Chillidaren lengoaia plastikoetara hurbilduko ditu parte-hartzaileak