Ahoz-Aho Ahozkotasunaren nazioarteko jaialdia bere ekuatorean da dagoeneko, eta gaur, hain zuzen, gala nagusia ospatuko da Biterin. Hainbat lurraldetako kontalariek parte hartuko dute jaialdian, 18:00etan hasita. Sarrera doakoa da, baina beharrezkoa da aldez aurretik gonbidapena eskuratzea Biteriko leihatilan edo, online, kultura.hernani.eus webgunean.
Bost kontalari, biharko saioan
Muga guztiak gainditu eta Azerbaijango, Kolonbiako eta Euskal Herriko kontalariak izango dira galako protagonistak. Honako hauexek izango dira kontalariak: Iñaki Carretero, Tarana Karim, Maider Alcelay, Nicolas Buenaventura eta May Gorostiaga.
Jaialdiak hilaren 2an ekin zion bideari, Itziar Rekalde kontalariarekin, liburutegian. Hurrengo saioa, berriz, joan den astean izan zen, asteazkenean, Lamatrioska konpainia txiletarraren eskutik. Hitzordu berezia izan zen azken hori, Zikuñagako libgunean.