Orion jokatu zuten, larunbatean, Gipuzkoako Batel Ligako zazpigarren estropada. Bertan aritu ziren Hernaniko Arraun Elkarteko zortzi batel, eta garaipena lortu zuten horietako bik: neska promesen batelak, eta neska absolutuenak.
Liga osoan zehar erakutsitako maila bikaina berretsi zuten neska promesek, eta sei segundutik gorako aldearekin nagusitu zen Hernani A, 7:15 denborarekin, Tolosaldearen aurretik. Horrela, lidertza sendotu dute sailkapen nagusian, eta abantaila haunditu dute. Hernani C zortzigarren izan zen (7:50) Orion, eta Hernani B 10garren (8:00).
Neska absolutuek ere, garaipen erosoa lortu zuten Orion, 10:31 denborarekin. 16 segunduren aldea lortu zuten, Hibaikarekin.
Maila ederrean aritu zen Hernani, gainerako kategorietan ere. Neska jubeniletan, hirugarren sailkatu zen, 10:10 denborarekin, Zumaiaren (9:57) eta San Juanen (10:01) atzetik. Mutil promesetan, berriz, laugarren izan zen Hernani (7:05), San Juan irabazleak (6:48) baino 17 segundu gehiago markatuta. Eta infantiletan, zazpigarren bukatu zuten Hernaniko bi taldeek: neskek 5:27 denboran osatu zuten proba, Zumaia irabazleak (5:07) baino 19 segundu gehiago; eta mutilek 5:16 denbora egin zuten, Orio garaileak (4:50) baino 26 segundu gehiago.
Jardunaldi bikoitza, datorren asteburuan
Datorren asteburuan, berriz, bi estropada jokatuko dituzte, Gipuzkoako Batel Ligan. Larunbatean, Lapurdin ariko dira, Donibane Lohitzunen; eta Urdazuri ibaian jokatuko dute estropada. Eta igandean, Getarian izango dute hitzordua. Horien ondoren, bi jardunaldi gehiago faltako dituzte, liga bukatzeko: Legution eta Pasai San Juanen.