Renferen Gipuzkoako aldiriko trenen zerbitzua moztuko dute martxoaren 19an eta 20an, asteburuan, hainbat puntutan konponketa eta berritze lanetan aritu behar dutelako.
Jakinarazi dutenez, distantzia laburreko trenen zirkulazioa etengo dute bi zonaldetan: batetik, Brinkola eta Beasain artean; eta, bestetik, Andoain eta Donostia artean. Lehenengo zatian, Zumarragako tunela «behin betiko» konpontzeari ekingo diote eta, horrekin batera, Gabiri eta Beasain arteko azpiko pasabidea konponduko dute. Bigarren zatian, berriz, Euskal Trenbide Sarea moztuko da Hernani eta Astigarraga artean egiten ari den Abiadura Handiko Trenaren obrak direla eta.