Aste Santua ate joka dugu dagoeneko, eta CD Hernanik futbolean entrenatzeko eta ondo pasatzeko aukera eskainiko die bailarako futbolariei. Hain zuzen, Aste Santuko I. CDH Kanpusa antolatu dute, eta 2010 eta 2013 artean jaiotakoei luzatu diete parte hartzeko deialdia. Hau da, izen-ematea egin ahal izango dute 8, 9, 10 eta 11 urteko umeek.
Kanpusa, bi txandatan
Futbola izango da kanpusaren oinarria, baina beste hainbat kiroletan ere arituko dira gaztetxoak. Besteak beste, eskalada, piragua eta arku tiroa ere landuko dituzte.
Horretarako, bi txanda prestatu dituzte. Lehenengoa, apirilaren 11tik apirilaren 15era artekoa izango da. Bigarrena, berriz, apirilaren 18tik 22ra bitartean egingo dute. Alegia, lau eguneko txandak izango dira, eta aurreratu dutenez, posible izango da bietan parte hartzea. Bietarako, ordutegi bera izango dute: 09:30etatik 13:00etara.
Tarifei dagokienez, klubeko haurrentzat 99 eurokoa da prezioa eta gainerakoentzat, berriz, 109 eurokoa. Aipatu dutenez, matrikularen barruan, ume bakoitzari botila berrerabilgarria eta kamiseta emango dizkiote.
Izen-ematea bi modutara egin daiteke: online, https://labur.eus/IMPnq formularioa beteta, edo, 619 310 453 telefonora idatzita edo deituta.