Martxan da, dagoeneko, Euskal Herriko XIII. Mus Txapelketa. Hasi dira herriz herriko kanporaketak, eta irabazleek Gipuzkoako Txapelketarako pasea lortuko dute. Ereñotzun eta Goizuetan, aurreko egunetan jokatu dituzte partidak, Irrintzi tabernan eta Umore Ona elkartean, hurrenez hurren. Hernanin, berriz, aste honetan eta datorrenean izango dira.
Kanporaketa, hiru egunetan
Denera, hiru egun zehaztu dituzte kanporaketarako. Bihar, ostegunarekin, Garin eta Ekos tabernetan jokatuko dira partidak. Etzi, aldiz, Zintzarrin izango dute txanda. Eta, horiez gain, datorren asterako ere zehaztu dute hitzordua. Hain zuzen, martxoaren 17an, ostegunean, Aralar eta Bodega tabernetan jokatuko dituzte partidak. Egun guztietarako, 22:00etan jarri dute hitzordua, eta taberna bakoitzeko bikote irabazleak Gipuzkoakora sailkatuko dira.