Joan den urtean, osasun egoera medio, ezinezkoa izan zen Osiñagako jaiak antolatzea. Aurten, ordea, egoera hobetu dela ikusita, festen antolakuntza jarri dute martxan batzordeko kideek. Gainera, bereziak izango dira aurtengo jaiak. Izan ere, auzotarrek aipatu dutenez, «30 urte beteko dira aurten Arriatxun jaiak ospatzen hasi ginela».
Antolakuntzarako, gazteak
Guztia prestatzen hasteko eta jaien nondik norakoak zehazteko, bilera antolatu du batzordeak. Igandean izango da, hilaren 13an, Arriatxuko eskolan. Goizeko 11:30etan jarri dute horretarako hitzordua, eta, bereziki, Osiñagako gazteei luzatu diete parte hartzeko deia. «Beste ikuspuntu batekin antolatu nahi ditugu jaiak, gazteei gustatzen zaizkien gauzekin», aipatu dute batzordekoek. «Oso gustura entzungo genituzke haien proposamenak, eta behar duten laguntza emango genieke».