Asteburu gogorra zeukaten Euskal Ligako bi talde hernaniarrek, eta ezin izan dute garaipenik lortu, bukaerara arte lehiatu arren. Neskek Galdakao hartu zuten igande goizean; eta espero bezala, luze jo zuen partiduak. Oso parekatua izan zen lehia hasieratik, eta 25-27 nagusitu ziren bizkaitarrak, aurreneko jokoan. Bigarrena ere eskuratu zuen Galdakaok (19-25), eta Hernanik hirugarrena irabazi arren (25-22), jokoen bukaeran gehiago asmatu zuten galdakoztarrek, eta 23-25 nagusitu ziren laugarrenean, garaipena lortzeko.
Aukera gutxiago izan zituzten mutilek, Sestao liderraren kontra. Puntu erosoa lortu zuten bizkaitarrek aurreneko jokoan (15-25), baina kontrarioak estutzeko gai izan ziren hernaniarrak, hortik aurrera. Are gehiago, 22-18 izan ziren aurretik bigarrenean, baina akatsak egin zituzten, eta 23-25 galdu zuten azkenean. Horrek asko zaildu zien partidua, eta borrokatu arren, hirugarrena ere galdu zuten (17-25).
Neska infantiletan, bestalde, elkarren kontra aritu ziren Hernani 1 eta Hernani 2, eta partidu haundia jokatu zuten bi taldeek. Joko estuak izan ziren denak, eta 1-3 nagusitu zen Hernani 2.