Emakume langileok askatzeko sozialismoa eraiki! lelopean, egitarau oparoa prestatu du Buruntzaldeako Itaiak, biharko eta martxoaren 8rako. Biharko ekintzak, Kontrakantxa gaztetxean gauzatuko dira, eta lehena arratsaldeko 19:30etan izango da: Oh gu hemen! saioari buruzko proiekzioa. Itaia Emakumeon Antolakunde Sozialistak ekoiztutako saio sorta honetan, emakume langileen aurkako zapalkuntza ezaugarritzen duten hainbat auziren inguruan arituko dira.
Proiekzioaren ostean, iluntzeko 20:30ak aldera, kontzertu akustikoa eskainiko du Nahia Vallek, eta jarraian, afari baten bueltan bilduko dira bertaratzen direnak. Afarira bertaratzeko, aurrez izena eman beharko da: Itaiako sare sozialetara idatzita, edo Itaiako kide baten bitartez.
Martxoaren 8an, mobilizazioa Plazatik abiatuta
Matxoaren 8rako, berriz, mobilizatzeko deia luzatu du Itaiak. Arratsaldeko 18:00etan hasiko da, Hernaniko Gudarien Plazan. Besteak beste, honako kexak aldarrikatzera aterako dira, herriko kaleetara: lan baldintzen okertzea; zaintza lanen lan karga haunditzea; hipersexualizazioaren normalizazioa eta indarkeria matxistaren forma berriak... «Horregatik, zapalkuntza ezberdinen aurka antolatu eta borrokatu behar dugu». Beraz, antolatutako ekintzetara bertaratzeko deia luzatu die herritarrei, Itaiak.