Martxoaren 5ean, Korrika Eguna ospatuko da Hernanin, eta nola ez, ekintza mordoz betetako egitaraua prestatu du Hernaniko AEK-k. Goizeko 10:30etan, Kanika Aisialdi Taldeak eta Gaztelekuak, haur eta gazteentzako ekintzak prestatu dituzte, Korrika eguna modu paregabean has dezaten. Jarraian, eguerdiko 12:00ak aldera, Ttarla dantza taldeak eta Kantuz abesbatzak dantzatu eta abestuko dute, Hernaniko Korrika omenduei omenaldi bat eginez.
12:30etatik 14:30etara bitartean, Iraulio Panttole Bertso Kabiya Bertso eskolaren eskutik, triki bertso poteo baten bueltan, kaxkoan barrena ibiliko dira, giro paregabea jarriz. Hernaniko AEK-k herritarrak gonbidatu ditu Hernaniko Korrika egunean parte hartzera eta ekimenarekin bat egitera: «animatu eta egin Korrikaren alde, Hernani, ekin Korrikari!».
Gaur Astigarragan, Korrika batzordea
Astigarragako Korrika batzordeko bilera izango da gaur, arratsaldeko 19:00etan hasita, kultur etxe zaharrean. Korrikari buruzko hainbat gai landuko dira eta bertaratzeko deia luzatu dute.