Gaur izango du otsaileko saioa, emakumeen euskal literatura mintegiak, Kattalin Miner idazle eta kazetari hernaniarrak gidatuta. Biterin izango da, arratsaldeko 19:00etan hasita; eta Eider Rodriguezen azkeneko liburua izango dute hizpide: Eraikuntzarako materiala, joan den urtean argitaratu zuena.
Estreinako nobela du idazle errenteriarrak, eta bertan, «aita baten puskak» bildu ditu: «etxeak egiteko behar den guztia saltzen zuen aita bat. Alkoholak blaitutako aita bat. Heriotzaren atezuan abiatzen da kontakizuna. Heltzear da, helduko da, eta hainbestetan sofatik lan haundiz altxatzen ikusitako aita, kalea balantzaka zeharkatu eta bulegoaren iluntasunean gotortzen zena, hitzekin laztantzeko modu bat entseatuko du alabak. Batera eta bakarka izandakoaren memoria sortu».
Ipuin kontaketa bihar, Lur Kortaren eskutik
Bihar, berriz, etxeko txikienek izango dute literaturarekin hitzordua, Biterin. Izan ere, ipuin kontaketa saioa eskainiko du Lur Kortak, 4-6 urte bitartekoentzat, bi txandatan: 17:30etan eta 18:15etan. Gonbidapenak eskuratu behar dira aldez aurretik, liburutegian.