Realeko mutilen talde nagusiak UEFA Europa Leagueko final hamaseirena jokatuko du bihar, RB Leipzigen talde alemaniarraren aurka, eta agertoki horretarako konbokatu dute Ander Martin Sanseko jokalari hernaniarra. Hain zuzen ere, Imanol Alguacil entrenatzaileak jokalarien zerrendan sartzea erabaki du gaur eguerdian, eta gainerako taldekideekin batera, Alemaniara bidaiatuko du Martinek. Norgehiagoka 21:00etan hasiko da, eta Movistar kanalaren bidez jarraitu ahal izango da.
Orain arte, bere karrera futbolistikoan, erdi punta lanetan eta ezker hegalean aritu da Sansekoa; baina, aurten, ordea, Xabi Alonso entrenatzaileak apustu argia egin du Martinekin. Izan ere, lerro bat atzeratu eta defentsan jartzea erabaki du, ezkerraldean. Eta maila bikaina ari da erakusten hernaniarra; biharko konbokatorian sartzea, hain justu ere, egindako lan onaren fruitua da.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!
