Bateletan zein aulki mugikorrean aritu dira Hernaniko arraunlariak, asteburu honetan; eta emaitza ederrak lortu dituzte. Aulki mugikorrean, zita garrantzitsua zeukan Beñat Odriozolak, igandean Orion: Euskadiko Distantzia Luzeko Txapelketan aritu zen, arraun egokituko skiffarekin; eta 21:34 denboran osatu zuen proba. Orain, Espainiako Txapelketa lehiatuko du hernaniarrak, datorren asteburuan bertan, Galizian.
Batelek, berriz, Zumaian zeukaten hitzordua, larunbatean, Gipuzkoako Ligaren bosgarren jardunaldiarekin. Eta bi garaipenekin bueltatu zen Hernani: neska promesetan eta absolutuetan nagusitu zen.
Garaipen haundia lortu zuen neska promesen A batelak, denboraldiko aurrenekoa. 7:16 denborarekin, lau segunduko aldea izan zuten helmugan, Oriorekin. Hernani B eta C batelak, berriz, 7garren (7:38) eta 12garren (7:57) izan ziren, hurrenez hurren.
Neska absolutuak, bere aldetik, bigarrenez nagusitu ziren (9:58), Hibaikarekin hiru segunduko aldea lortuta.
Maila ederrean aritu ziren hernaniarrak, gainerako lau kategorietan ere. Mutil promesen batela hirugarren izan zen, 7:04 denborarekin, San Juan irabazlea 18 segundu aurretik zuela. Eta beste horrenbeste egin zuten neska jubenilek, hirugarren, 9:36 denborarekin; 10 segundu gutxiago behar izan zituen San Juanek, irabazteko. Eta infantiletan, azkenik, bosgarren sailkatu zen mutilen batela (5:15), eta zortzigarren neskena (5:30).
Oriaren Jaitsieran, Maialen
Asteburu honetan ez da jardunaldirik, Gipuzkoako Batel Ligan. Baina uretara aterako dira hernaniarrak, estropada bereziarekin: Oriaren Jaitsieran ariko da Maialen trainerua, larunbatean, arratsaldeko 16:30etan hasita Orion.