Emaitza gazi-gozoak izan dituzte bailarako pilotariek txapelketa ofizial eta pribatuetan, izan ere, 9 garaipenekin eta 10 porrotekin bukatu dituzte jardunaldiak.
Udaberri Txapelketan lehengo mailako kadeteen artean nabarmentzekoa da, Iturbe eta Azpeitiak, Ilunperen aurka jokatutako partidua (22-7) eta lehenengo mailako jubeniletan, Manterola eta Etxarrik Tolosaren aurka lortutako garaipena ere ederra izan zen (16-22).
Gipuzkoako Trinkete Txapelketan, berriz, Manterola eta Jara gazteek, Behar Zanaren aurka jokatu zuten, eta 40-32 markagailuarekin nagusitu ziren hernaniarrak. Datorren asteburuan, Intza (Lasarte) garaituz gero, finalera sailkatuko dira, zuzen-zuzenean.
Lidertzaren bila, Salaberria
Asteburu honetan, porrota jaso du Iker Salaberria goizuetarrak, Tafallan. 19-22 galdu zuten Salaberriak eta Erostarbek, Zubizarreta III eta Eskirozen aurka. Hala ere, Salaberriak eta Erostarbek, larunbat honetan dena emango dute Labriten, lidertza lortzeko. Arratsaldeko 17:15etan emango zaio hasiera, norgehiagokari.