Joan den astean EAJren oharraren harira, Hernaniko Udalak argibide hau helarazi du: «Santa Barbarako harrobiko betelanen kalitateaz sortutako zalantzak argitu nahian, Hernaniko Udalak iazko abenduan ekin zion azterlan bat egiteko prozedurari. Ingurumen Sailak enpresa aditu bati enkargatu zion azterlana egitea eta joan zen astean jarri ziren lanean. Orduan hartu zituzten material solidoen laginak eta joan den astean uren laginak hartzekoak ziren. Horiek guztiak aztertu ostean, hilaren amaieran emango diote txostena Udalari».